एकले अर्कोलाई नबुझे घर कसरी चल्छ र
शंकामै डुबिरहे मायामा भर कसरी चल्छ र
मैले पठाएको मेसेज सिन समेत गर्दैनौँ,
पूरा जिन्दगी बिताउन जाँगर कसरी चल्छ र ।
कोही मान्छे नबोल्दा पनि खास लाग्दो रहेछ
मनभरि कता न कता आस लाग्दो रहेछ
केही कुराहरू मनमै सिमित भएपछि,
जिन्दगी कहिले कसो उदास लाग्दो रहेछ ।
आफ्ना कुरा भन्न डराउनु पनि त माया हो
कल्पनामै डुबी हराउनु पनि त माया हो
उसले स्विकार्दैन भन्ने थाहा भएतापनि,
एकतर्फी मन पराउनु पनि त माया हो ।
तिमी अनि म बिचको सम्बन्ध बबाल हुनुपर्छ
देख्दा दुनियाँ छक्कै पर्ने मायाजाल हुनुपर्छ ।
मनभित्र इच्छा मुना मदनझैँ बन्न सकुँ
यति बुझ्नु म किनारा तिमी ताल हुनुपर्छ ।
जिन्दगीमा नलगाउनु माया लाइसकेपछि
एकअर्काको सत्यता थाहा पाइसकेपछि
मसँग नभएको धन अनि रूप नखोज्नु,
नछुट्टिने वाचा र कसम खाइसकेपछी ।।
