हरियो पासपोर्टको सपना
कहिलेकाहीँ लाग्छ
आफ्नै जीवन
रंग विहीन जस्तो,
मानौँ पानी नपरेर
खडेरी परेको
उजाड भूमि जस्तो।
हरियालीको मुहार
नदेखेको
मरुभूमि जस्तो।
देशको अवस्थालाई
नियाल्छु,
पूरा अन्धकार देख्छु
मानौँ उज्यालोले
कहिल्यै पाइला टेकेको
छैन।
भविष्य सम्झन्छु,
टोलाउँछु अनि सोच्छु
उपाय केही लाग्दैन।
अनि...
देख्छु, हरियो पासपोर्टको सपना।
हरियो पासपोर्टको सपना
आजकाल,
राजनीतिमा 'झोले' शब्द
खुब प्रचलित रहेछ।
पार्टीको अन्धभक्त ,
स्टाटस र भाषणमा
आफ्नो पार्टीको मात्र
गुणगान गाइराख्नेको
नाम राख्दा हुन्छ झोले
बिन्ती ,
झोला बोकेका सबैलाई
झोले नामले नचिनियोस्
हरियो पासपोर्टको सपना देखेर
यात्रा गर्नेहरूको नाम
झोले नराखियोस्।
किनभने,
हरियो पासपोर्टको सपना देख्नु दोष होइन,
यो बाध्यता हो
र म देख्छु...
फेरि पनि,
हरियो पासपोर्टको सपना।
सुनिता मोक्तान
सुर्यगढी- १, नुवाकोट
